環遊酒世界 - 南美州篇 (阿根廷)

同樣係南美州既阿根廷,同智利就係隔住安第斯山脈,智利係安第斯山脈西邊,阿根廷就係東邊。安第斯山脈同樣造就阿根廷唔少美酒,如果話智利係受惠於由安第斯山脈吹向西面太平洋、由山頂下沉至山腳既冷空氣,阿根廷就係受惠於安第斯山脈既高海拔。高海拔而成既阿根廷酒,究竟有咩特別?

阿根廷:高山上的美酒國度

阿根廷係南美州第二大、世界第八大既國家,全球第五大產酒國、第九大葡萄酒輸出國,葡萄田總面積達489,191公頃,超過75%係位於阿根廷中部以西、安第斯山脈東麓山腳既重要產區 Mendoza 門多薩

阿根廷最高海拔既葡萄園講緊係海拔接近11,000尺咁高 (即係3,300米左右),雖然唔係全世界最高海拔既葡萄園 (根據健力士世界紀錄,呢個榮譽係屬於西藏拉薩曲水縣蔡納鄉既Pure Land & SuperHigh Altitude Vineyard葡萄園,海拔3,563.31米),但絕對係平均海拔數一數二咁高既葡萄酒產區,好多葡萄園都係海拔2,800至5,000尺左右既地段。海拔2,800尺,相較其他產區,究竟有幾高?波爾多Medoc係世界數一數二低海拔既產區,最高都只係133尺 (平均講緊係33-66尺);勃艮地Côte d’Or葡萄園係海拔755至1,300尺;美國Napa Valley既範圍再大d,由海拔200尺到2,200尺都有。比較之下,阿根廷既葡萄田真係好高好高。

點解要種到咁高?呢個同阿根廷本身既氣候有好大關係。阿根廷氣候災熱乾燥,安第斯山脈阻擋左由太平洋吹黎既濕潤海風,門多薩又屬於冷沙漠性氣候,向高發展溫度更低更清涼,可以延長提子既成熟時間同時保持酸度,有更多日照令提子光合作用更有效提子更健康,高山融雪後既雪水亦可以滋潤提子,亦帶來更多礦物質及養份,令產酒更複雜多層次。唔少阿根廷名莊都用左唔少資源去鑽研高海拔對葡萄酒既影響,以求釀造出更出色既靚酒。

阿根廷招牌提子品種:Malbec 馬貝克

阿根廷最招牌既提子品種,絕對係Malbec。Malbec係19世紀由歐洲帶到阿根廷,1867年歐洲根瘤蚜蟲大災害後,原種葡萄藤係歐洲絕跡,冇受根瘤蚜蟲影響既阿根廷保留最原始既葡萄藤至今。Malbec係阿根廷既種植面積達112,823公頃,佔全國葡萄園總面積既23.06% (紅酒提子品種既39.44%)。Malbec係阿根廷可以話係如魚得水,高海拔、高溫差既風土令佢生長得更出色優雅。顏色深遂既Malbec果味爆膨,車厘子、布冧等甜美果香中帶少少香料味,係寒冷地區種植仲會有更多既黑果味道,單寧絲滑,單一品種咁釀酒、又或者係同Cabernet Sauvignon等其他提子混釀,都各有風采。

阿根廷既白酒提子Torrontés 亦非常有名,清爽芳香,酸度中等,帶白桃、啤梨、菠蘿等香氣,同樣有唔少fans。

阿根廷既高級靚酒

作為全球第5大產酒國、第9大葡萄酒輸出國,阿根廷有唔少實惠而質素唔錯既平價酒。另一方面,佢地既高級靚酒亦係世界舞台上發熱發亮。

阿根廷既高級靚酒,必定要數Catena ZapataCheval des Andes

Catena Zapata係1902年創立,是為阿根廷於高海拔地區種植提子既先鋒,亦係推廣當地種植Malbec既代表人物,成功將阿根廷酒打入世界美酒行列。酒莊既Adrianna葡萄田位於海拔5,000尺,保存左當年由歐洲帶列阿根廷既原種Malbec及Cabernet Sauvignon葡萄藤,旗艦酒款Nicolás Catena Zapata根據當年收成調整Malbec及Cabernet Sauvignon的比例,混釀出最出色既濃厚靚酒。佢地更成立左葡萄酒研究機構Catena Institute of Wine,致力研究及改進阿根廷既釀酒科學及技術。

Nicolás Catena Zapata更係1997年被Decanter選為”Wine Legends” 酒界傳奇人物,作為引領阿根廷現代美酒既靈魂人物,稱佢為酒界傳奇,實在當之無愧。

Cheval des Andes 由波爾多Saint Emilion特等A級名莊Château Cheval Blanc白馬酒莊、與LVMH旗下的Terrazas de los Andes合作創立,結合法國傳統工藝及阿根廷安第斯山脈既獨有風土,係海拔3,500尺以上、位於Mendoza兩個不同地段既葡萄園種植提子,混合Malbec及Cabernet Sauvignon,釀出濃厚複雜又平衡既超高分美酒。好似近期既2017年份,就獲得RP97+超高分好評,2018年更攞到RP98分!散發著濃郁的黑加侖子同黑櫻桃氣息,單寧細膩,口感果香爆棚,餘味持久,伴有煙草、香料和皮革的氣息,真係非常好飲!

上面兩款阿根廷高級靚酒,每年都獲得不同酒評家超高分評價,但係價錢仍然相對有吸引力,誠意推介!