「溝酒」導致斷片?

 當胃部接觸到酒精，酒精係會得VIP嘅招待：立即由胃部經小腸滲透入血液再輸送到全身，首先係直送大腦。再隨著身體吸收酒精份量，尤其亞洲人身體缺乏解除酒精嘅酵素，引致wing wing地「小醉」到「斷片」，場面就會好難睇。

但平時出去食飯/見客/Party/……都避免唔到要飲酒嘅場合，有無方法減低「斷片」呢d場面嘅出現？

有兩個方法可以令大家飲完酒無咁快暈低：空肚食早餐就聽得多，空肚飲酒就真係大忌。切記要避免空肚飲酒，因食物可以減慢酒精吸收成為第一防線，尤其難消化嘅脂肪成份/蛋白質含量高嘅食物，打咗底先。另外飲酒嘅同時，都可以趁空檔飲多d水，補充因酒精而流失嘅體液水份。

      而有汽嘅酒精飲品，啤酒同香檳等會令人更快飲醉，因為汽泡會刺激胃部加速吸收。所以一般宴會、酒席都會以香檳打頭陣，清新嘅口感做開胃酒係一流，亦令賓客情緒高漲，同時帶動氣氛。 同理，記得唔好飲完酒再飲返有汔飲品，就會令你快速「上腦」。

         點解溝酒之後我地會飲到更多酒？當我地係一個酒局中，大腦已經受到酒精影響，同時又處於高漲嘅情緒，所以會高估自己酒量，直至大腦失去知覺「斷片」。所以溝酒嘅元兇係自己醉咗嘅大腦，佢會失去判斷力同自制力，然後發生過d咩都唔會記得。下次飲酒記得衡量下自己可接受嘅程度！