酒杯清洗及儲存秘訣

       功欲善其事，必先利其器。愛酒之水對酒杯當然講究，水晶高腳杯一隻都唔平，更何況係名牌/手工製造嘅酒杯，除咗會好錫住咁用，仲要好小心咁洗同收藏，洗得唔夠乾淨或者儲存環境如果有影響，都會令下次飲酒嘅心情同經驗大打折扣！

大家喺出面見到餐廳嘅杯好似識發光，但自己洗完就會有水漬？出面餐廳有蒸氣洗碗機但正常家庭唔會有；無問題嘅，只要我地有熱水，同一條乾淨毛巾就可以做到相同效果。

首先用水溫大約90 度嘅水倒入酒杯，搖動酒杯溶解杯內污跡，大約30秒後倒出，最後用乾淨毛巾抺乾。過程係好簡單但都有幾個重點留意:

       • 過程中唔可以用洗潔精。因洗潔精嘅化學味道會殘留，然後影響下次飲用葡萄酒。

       • 清洗過後要放喺空氣流通位置，唔好用紙箱儲存酒杯，因紙皮味會走入杯內， 令下次使用前要再次清洗。