年份香檳，點解貴過NV無年份香檳咁多？

無年份香檳係混合左唔同年份既提子釀成既基酒去釀香檳，從而得到一個味道同質素都更穩定、無論係咩年份收成如何、釀出黎風格都相對一致既香檳。就係因為咁，無年份香檳既產量比較多同穩定，亦係反映香檳莊自家風格既最佳入門。

 

至於年份香檳，顧名思義就係只用一個年份收成既提子去釀既香檳。唔似普遍既紅酒白酒，年份香檳往往只會係收成好既年份先會釀造，反映返果個年份既風土。收成唔好既年份，香檳莊會寧願用果d冇咁靚既提子、加埋之前既基酒去混釀出穩定而有水準既無年份香檳，絕對唔會用唔靚既提子「格硬黎」，因此年份香檳既質素絕對有保證，亦比無年份香檳更為少產，價錢亦當然貴一大截。好似被捧上神級既Salon香檳，成個20世紀100年入面只出過37個年份，可見香檳莊對靚年份先出年份香檳可以去到幾執著。

 

唔少香檳莊係普通既年份香檳款式之上，仲有prestige cuvée 頂級香檳 ，係品牌最top既香檳款式，只用最好既提子、係最好既年份、用最細膩既方式去釀造。呢堆頂級款式，係香檳莊既鎮店之寶，產量更少，價錢就更為昂貴，但佢地優越獨特既質素絕對唔係普通款式比得上，所以貴一貴都有唔少fans追住飲！好似Palmes d’Or 2008，其實就係法國銷售量第一既香檳品牌Nicolas Feuillatte既prestige cuvée；另一款香檳Pol Roger Cuvee Sir Winston Churchill 2009 就係Pol Roger以非常愛飲呢個品牌既英國著名前首相邱吉爾命名既prestige cuvée。其他令人趨之若鶩既prestige cuvée，包括Perrier Jouet巴黎之花既Belle Epoque、Louis Roederer既水晶香檳Cristal、Ruinart既Dom Ruinart等等。