點解要醒酒

人要抖氣，皮膚要抖氣，連酒都要抖氣？

唔知大家有無聽過人試酒嘅時候講：「枝酒好緊閉，無乜香味。」酒點為知緊閉？簡單黎講當你聞落枝酒咩味都無，不論果味，木桶味都無嘅時候，就代表佢仲沉睡緊。而喚醒佢嘅方法就係同空氣接觸 – 即係醒酒。

當酒同空氣一接觸就會開始氧化，從而令味道產生改變。可喚醒酒香，更令單寧變得順滑，飲落無咁「鞋」。平時見人飲酒攞住隻杯得閒就「浪下浪下」，就係因為想加快醒酒過程，令佢快啲達至peak – 最美味嘅一刻。

除咗就咁倒落酒杯醒酒，對年份較新嘅酒亦可考慮用Decanter 醒酒器。醒酒器比酒杯容量更大，葡萄酒同空氣就接觸得更多，咁就可以早啲品嚐美酒啦~