fbpx

細數投身葡萄酒行業嘅名人 - 華人篇

講起邊個名人鍾意飲紅酒,相信大家都會諗起「紅酒財爺」唐英年。多得佢對葡萄酒嘅熱愛,令香港受惠於零葡萄酒稅。但除咗佢,係香港同國內都有好多飲紅酒飲到入埋行嘅名人。今日就向大家介紹下同葡萄酒結緣嘅明星。

廖碧兒

不時係廖碧兒嘅FB Ig見到葡萄酒嘅身影,記錄佢品嘗過嘅靚酒同到訪過嘅酒莊。近年除咗影藝事業,佢仲考左品酒師牌同收購葡萄園,成立個人品牌「Bellavizio」,積極向葡萄酒界發展。

劉嘉玲

劉嘉玲就係另一位鍾意飲酒所以向酒界發展嘅本地女星。可惜之前發售嘅法國酒反應麻麻地,近月捲土重來發售一系列意大利酒「+0」,成績好唔好過上次大家拭目以待。

趙薇

法國酒fans趙薇走訪過好多酒莊,最後決定買入一間波爾多酒莊Chateau Monlot,致力發展葡萄酒事業。佢曾經講過:「葡萄酒能令人精神世界變得非常豐富甚至瘋狂。」可想而知佢對紅酒幾有熱誠。

姚明

估唔到籃球明星都做酒? 姚明退休後係美國納帕山谷買咗幾個葡萄園,仲以自己個名Yao Ming成立咗間公司黎做酒,不過行高檔路線,產量唔多,香港都唔易揾到。

今次就介紹住咁多先,聽日會同大家介紹埋國外鍾意葡萄酒嘅名人,密切留意!

[/col]