酒評家俾支酒既分數，其實係點得出黎？教你睇RP分數

睇一支酒既介詔，好多時會見到「RPXX」呢一個分數。飲開酒既朋友仔、甚至唔飲酒既朋友仔，相信都知道RP係著名酒評家Robert Parker既簡寫。不過，Robert Parker一個人當然冇可能試勻晒咁多酒（更何況佢已經係2019年正式退休唔寫酒評）。依家大家見到既分數，其實係由Robert Parker創立既Robert Parker Wine Advocate 專業酒評家團隊所給予既評分。

先講下點解 RP評分 有咁大影響力 – Robert Parker 所創既呢個100為滿分既葡萄酒評分系統可以話係開創左酒評既業界標準，佢認為100分系統相比20分系統更有彈性，更能反映出葡萄酒質素既差別。RP既俾分由50-100分不等，分數所代表既品質級別如下：

96 – 100
極為優秀既葡萄酒，複雜而深刻，展示左經典好酒所需要既所有特質，值得特登花心思去尋找、購買及享用。

90 – 95
出眾既葡萄酒，有過人既特質及複雜性。簡單黎講，係一支非常好既酒。

80 – 89
質素中上至很好，有一定程度既細緻品質、味道及個性，冇明顯既缺陷。

70 – 79
質素平平，沒有明顯優點但整體黎講品質紮實，直接了當而無甚特別。

60 – 69
質素比平均差，有明顯缺點，例如酸度或單寧過高、淡而乏味、有不討好既氣味或味道等。

50 – 59
一支不能被接受既葡萄酒。

而係分數既後面，有時你會見到有個+加號，係指酒評人相信呢支酒既質素會隨時間上升。而括號既分數，好似（90-93）咁，係代表試酒時係從木桶倒出試酒sample而唔係由裝瓶後既final bottle中倒出，因此評分可能有少許落差，給出一個範圍評分。

酒既好壞可以非常個人，呢個評分制度係以同產區/同風格/同提子品種既酒互相比較，唔少酒亦會試好幾次再取平均分，以減低分數上既偏差及不公。一個量化後既分數，可以更簡單直接既反映一支酒既好壞，對於消費者黎講，係革命性既改變，亦因而改變左整個葡萄酒業既形態及發展。

當然一個分數並不能代表一切，人人既口味都唔同，酒評人覺得好既酒未必係你覺得好既酒，所以睇分數既同時，睇下評酒時既tasting note，了解下支酒點解係呢個分數亦同樣重要。

Robert Parker 創立既呢個評分系統對酒界既影響，直情可以寫幾篇論文！今次講住咁多先，及後再慢慢同大家更詳細分享酒界係RP出現後既改變、酒界對佢既批評、其他酒評家既評分系統… 等等等等