日本酒(清酒) Vol.1 大吟釀·純米大吟釀

日本酒(清酒) 入門

最近見唔少酒友飯聚都轉帶Sake出黎，少飲日本酒嘅酒友，望住張lable，隻隻字都中文但都係睇唔明「精米步合」，「山田錦」，「純米大吟釀」？咩黎咖？其實認住幾個Keywords，已經可以掌握大部份香港最常見酒款，下次揀日本酒／同酒友飲酒困惑不再〜

大吟釀·純米大吟釀

日本酒(清酒)用米發酵釀造，可選用嘅米有特定品種，「山田錦」就係其中一種。

未經打磨嘅米叫「玄米」，即平時講嘅糙米，有層硬殻，而造酒嘅米只用米心，「精米步合」/「精米程度」45%指粒米磨走了55%，得返45%。部份酒標會寫「二割三分」，表示精米步合23%。

粒米磨走愈多(精米程度愈低)，造酒要用嘅米就愈多，成平自然會更高。大吟釀同純米大吟釀都係用精米程度50%以下嘅米釀造，所以價錢比一般日本酒貴。

日本由北海道到九州，每個縣都有各自風味嘅清酒出產，水源／造法／原料嘅不一樣都會產出具有當地特色嘅酒，包括濁酒，甚至Sparkling Sake.

作為日本國粹，最適合嘅Pairing當然係日本料理，海鮮，鍋物，炸物等；不同季節都有相應適合時令嘅清酒搭配，配搭西餐／中餐都係唔錯嘅選擇。早前同朋友去咗間專飲Sake嘅餐廳，其中一樣佐酒菜「酒盗」係法國芝士，結果係出奇地夾！

日本酒(清酒)真係有太多種，可以pair嘅野食似乎比葡萄酒多元化，可能性都好大；以下開放討論你嘅日本酒(清酒)Food Pairing~

#夏天愈黎愈多人飲sake

#同葡萄酒一樣怕光怕熱會氧化

#sake真係有好多種

#但sake熱量平均比葡萄酒高

#日本國粹

#日本酒超入門

#要鑽研嘅話仲有好遠路