【青藏高原精釀?】【?西藏青稞酒】（非賣品)

自從對飲酒有興趣，每次去旅行都會發掘有當地特色嘅酒

甚至朋友去旅行都會買土產嘅酒返黎做手信。最近搵返枝早兩年去西藏旅行時買嘅青稞酒，同大家分享下。

圖中呢款青稞酒係蒸餾酒，酒精度達40%，利用青藏高原獨有嘅穀類糧食—青稞製成。

藏民每家每戶都自己造青稞酒，酒精度低，係藏民嘅傳統智慧，原料喺當地都好容易取得，係採於自然嘅在地特產。

造法有少少似米酒：將青稞洗乾淨，用水浸透然後蒸煮，邊蒸邊用木棍攪動令青稞均匀受熱。蒸到8成熟就放涼，放喺白布上撒上酒曲(酒釀），包好，放喺27-30度嘅環境2-3日就發酵成酒。不過呢兩款係經過多次蒸餾提高酒精度而成。

呢兩款有陣好香嘅鮮味，似日本清酒，入口好濃郁好厚身，味道好集中，同時感受到好幾種味道，包括米酒味，鮮味仲夾雜些少Whisky嘅麥香。

當地都有另一款罐裝，酒精度大概1%，飲落似果汁，米水色，微甜，都無日本甘酒咁甜，係一種可以日常飲用嘅飲品。

同Whisky一樣，水對酒都係好重要嘅原素，青稞酒嘅水更係源自西藏冰川，真係滴滴珍貴！