環遊酒世界 - 南美州篇 (智利)

南美州既酒係香港非常普遍,有非常多既超市開架酒都係來自智利同阿根廷,而兩個國家都各自有頂尖酒款在近十幾年大受關注,獲得酒評家100分滿分好評,係盲評中足以同法國既超級名莊媲美,實在係平有平好、貴有貴好既多元化產區。

點解呢兩個國家會一齊講?佢地緊鄰既地理因素當然係其一,而且兩者都有性價比極高既美譽。同樣位於南美州、同樣係新世界響噹噹既產酒大國,智利同阿根廷產酒風格看似相近,但其實細睇就會發現佢地風格非常不同。今次就先講講智利酒!

智利的風土

智利國土細窄而狹長,從南到北講緊係足足4,300公里,東西平均距離卻只有200公里。之但係,智利既產酒大區最新既官方劃分方式,並唔係好似2011年以前咁由南到北咁去劃分,而係由西到東,分為岸區(Costa)谷區 (Entre Cordilleras)山區 (Andes)。點解?因為西面既太平洋、同東面既安第斯山脈,先係影響當地風土最主要既因素。

面臨太平洋既岸區,有清涼既海風,加上東面山脈吹黎既強風同晨間既霧氣,氣候更加清涼,最適合怕熱既Pinot Noir同幾款白酒提子如Sauvignon Blanc、Chardonnay等等生長,而且岸區土壤礦物成份高,造就更優雅複雜既好酒。

谷區東有安第斯山脈、西有海岸山脈,一直以來係智利既重點產酒區,全國60%既酒都係產自谷區。好多Aconcagua Region同Central Valley Region既產區,例如著名既Colchagua Valley同Maipo Valley,就有唔少分區係座落於谷區(不過視乎地理位置,有部分其實歸入岸區/山區,不能一概而論 )。谷區有相對溫暖既地中海氣候、充足陽光、清涼夜晚、沉積土壤… 岩哂濃郁飽滿既Cabernet Sauvignon,亦有種植Carménère、Merlot等等。

山區位於內陸,多得安第斯山脈下沉到山腳既冷空氣,日夜溫差大,減慢提子既成熟過程,保留果實既酸度,產酒強勁有力而酸度充沛,更加有個性同結構,唔少智利超級名酒就係於山區誕生,例如Aconcagua Valley既Santa Maria產區、Maipo Valley既Santiago同Puente Alto產區等等。.

智利國寶提子品種:Carménère 佳美娜

講到智利酒,一定要講佢地最有代表性既提子Carménère 佳美娜。這款提子於19世紀由法國波爾多帶到智利後被廣泛種植,但過去150年來一直被以為係Merlot,後來經過重重DNA驗證,在1998年才正式被智利農業部確認為獨立品種。Carménère雖然源於法國,但在1867年歐洲根瘤蚜蟲大災害後,係法國近乎絕跡,倒是由智利將佢發揚光大,成為智利最有名既提子品種。Carménère色澤深紅,紅果香氣濃郁,帶香料及煙燻氣息,單寧較Cabernet Sauvignon柔和,既可獨立釀酒,亦會與Cabernet Sauvignon混釀用以增加色香氣,同時每支酒更柔和。智利酒界大哥大Montes酒莊的紫天使Purple Angel,就係一款92%Carménère + 8%Petit Verdot、完美展現智利Carménère魅力的優秀酒款。

智利四大酒王

智利既高端酒近年大受注目,四大酒王Almaviva、Clos Apalta、Seña同Vinedo Chadwick,各有各精彩:

Almaviva 係1996年由一級莊Chateau Mouton莊主同智利大酒商Viña Concha y Toro建立,以Cabernet Sauvignon為主,配合智利風土釀成,提子產自Maipo Valley的Puente Alto區,濃厚有勁又不失優雅,係智利山區超級靚酒既俵俵者。

Clos Apalta 屬於Lapostolle家族,原本係法國生產著名嘅香橙利口酒-Grand Marnier。之後Marnier Lapostolle 既繼承人於1994 年係Aconcagua Valley入面既Apalta Valley成立酒莊,雖然身在智利,但做出非新世界嘅style,唔會太偏重木桶味,更講求細緻同平衡感。旗艦酒Clos Apalta及副牌酒Le Petit Clos,每年都依照提子既狀態去用唔同既blending釀造。Clos Apalta大多時都係以Carménère為主幹、混合Cabernet Sauvignon、少量Merlot及極少量Petit Verdot,Le Petit Clos 2017年份及以前則以Cabernet Sauvignon為主、2018年份改以Carménère為主幹。Clos Apalta濃郁成熟優雅,Le Petit Clos則更有expressive更適合年輕飲用,同一風土、兩種風格。Clos Apalta近年多次取得滿分,而副牌Le Petit Clos亦係90分以上既高分美酒。

Seña 由美國神級釀酒師 Robert Mondavi 同智利釀酒 Eduardo Chadwick創立,成立酒莊嘅目的係要一洗大家對智利酒嘅既定印象,打造世上最好既葡萄酒。Seña絕對係超級成功,係盲評fight低波爾多四個一級莊,各個酒評家都給予極高既評價。Cabernet Sauvignon成份最多,混合智利本地提子Carménère,同時加入Cabernet Franc、Malbec及Petit Verdot去平衡成支酒,係Aconcagua Valley以生物動力自然農法種植及釀造,醇美卓越,超高分好評不絕,係智利谷區既超級好酒代表。

Vinedo Chadwick 第二個出產年份2000年份已經係柏林品酒會盲評贏過Lafite同Margaux兩個波爾多五大酒莊,而2004年份首次獲得James Suckling 100分評價,係智利第一支滿分酒款。呢款來自Maipo Valley Puente Alto區既靚酒,超過90%都係Cabernet Sauvignon,濃厚柔順又酸度充足,近年一直維持超高分水準。

平有平好、貴有貴好、實力超水準性價比極高既智利酒,你今日飲左未?

智利最新酒區地圖: