加冰飲既特濃香檳!簡易 Champagne Cocktail 無難度!

有香檳品牌特地研發左專門俾大家加冰飲用既特濃香檳。加冰飲除左可以更好咁keep住香檳既適飲溫度,仲好岩用黎整champagne cocktail,係戶外party既絕佳美酒選擇。今次就同大家分享一下幾個簡單既飲法,好飲又夠靚,打卡一流!

1) 最簡單直接既做法:加garnish裝飾

用杯口比較大既酒杯(推薦用白酒杯),加入3-4粒冰,再依照喜好係下面咁多材料之中揀一樣放入杯/插係杯緣,倒入香檳,done!

清新口味garnish:

  • 青瓜片或青瓜條
  • 西芹條
  • 新鮮迷迭香
  • 鮮薄荷葉
  • 鮮薑片

水果口味garnish:

  • 青檸片/檸檬片/橙片/西柚片
  • 紅桑子粒/士多啤梨片/紅石榴粒
  • 鮮菠蘿片
  • 蜜桃片
  • 蘋果片/啤梨片

2) 進階版:靚靚香草冰取代普通冰粒

有心機有時間既朋友,不妨用香草/水果粒/食用花,自製靚冰,視覺效果加倍!你仲可以隨時mix & match唔同顏色既材料放入同一粒冰,例如basil+紅桑子粒+紫色食用花、薄荷葉+玫瑰花瓣+檸檬… 甚王加入熊仔軟糖整冰。朋友見到杯野飲肯定大讚好靚同好有心思!

3) 專家級:杯緣沾上鹽 / 糖,口味更特別

落bar飲margarita,杯邊沾滿鹽粒,飲既時候cockatil既味道加上少少鹽既鹹味,非常過癮。飲champagne cocktail當然亦可以咁做。先預備好想沾上杯口既鹽/糖,薄薄咁鋪係一隻碟上面(記得要鋪到大過杯口),另外一隻碗/碟就放少少水,將酒杯杯口蘸水,再蘸鹽/糖,咁就得喇!你仲可以自己整唔同口味及顏色既鹽/糖混合調味料,配合唔同既garnish,變奏出更多有趣味道!

  • 經典青檸口味:青檸皮磨碎後與幼鹽及少量砂糖糖混合,可配合各種清新口味garnish。想青檸味更突出既,可以先用青檸角抹杯邊而唔係蘸水去令鹽痴上杯邊。
  • 熱帶風情(甜美版):檸檬皮磨碎後與椰糖及少量椰絲混合,可配合菠蘿裝飾。
  • 熱帶風情(鹹香版):檸檬皮及少量乾紅椒片磨碎後與幼鹽混合,鍾意更刺激既可以加入黑椒碎 / 粉紅胡椒碎。加冰加菠蘿粒入杯,最後倒入香檳。
  • 優雅茶香:蘸上磨碎既香片茶葉。可用小茶隔盛載已泡開既茶葉,倒入香檳時透過茶隔,汲取更多茶香。。
  • 迷人pink lady:唔用水、改用切開既士多啤梨抹杯邊,再蘸上粉紅色砂糖,配合粉紅香檳。
  • 爆炸口味:用爆炸糖沾滿杯口,飲落保證驚喜!

 加冰飲既香檳有咁多變化,開party又點少得佢!